Catur Marga Yoga

DHARMA WACANA BAHASA BALI

2011

“OM SWASTIASTU”

Inggih suksma atur uningayang titiang majeng ring pangenter acara utawi sang ugra wakya antuk galah sane katiba ring padewekan titiang sadurung titiang ngaturang jagra pinunggu amatra dumadak dumadik antuk asung kerta wara nugrahan ida SANG HYANG WIDHI WASA irage sinareng sami ngemanggihin kerahajengan lan kerahayuan.

Inggih  majeng ring para manggala para sujana dang acharya miwah para maha diaksa sane banget kusumayang titiang,asapunika naler majeng ring para manggala para nayaka panureksa sane banget mustikayang titiang,lan para pemilet lomba mepidarta bali sane banget semaliha mantuk ring ratu ida dane para semeton titiang sinareng sami sane banget tresna asihin titiang.

Ring rahinane sane kelintang becik puniki angayubagia pisan titiang isangkur mabet jamprah polih ngameletin pacentokan mapidarta puniki boyo  je titiang sekadi nasikin segara purun peresangga titiang ngadeg ring ajeng ratu ida dane para semeton titiang sane sampun sahuninga indik kawentenan titiange sekadi mangkinpuniki wantah nyarengin lomba mepidarta bahasa bali dumogi ajeg bahasa balin druene.

Inggih ratu ida dane para semeton titiang sane manubagia mungguing bantang bebaos sane jaga atur uningayang titiang nenten wenten tios ngeninin parindikan sane mamurda

“CATUR  MARGA  YOGA PINAKA SULUH IKANG PRABHA”

Inggih ratu ida dane para semeton titiang sane dahat tresna asihin titiang, mungguing raga sampun prasida tatas sauning indik pakibeh jagate sane mangkin inggih punika awaor tan pawates risejeroning melaksana, akeh pakibeh luir nyane : sex bebas,mareko,narkoba, nerobos lampu barak  taler minum – inuman sane ngawinang punyah raris ical manahnyane sane waras , lali ring padewekan, lipia ring angga tan madalem jiwa pramana. Asapunapi antuk nepasin pakibeh punika?, to ngudiang akeh pertak janane keni pakibeh kadi asapunika?

Inggih ida dane sareng sami sane banget wangiang titiang, akeh sastra agama sane pinaka anggen dasar nepasin awor tan pewates sekadi iwawu  sinalih tunggil wenten sane kabaos ajaran catur marga yoga, yening baosang indik kruna ring ajeng saka siki manut artos nyane: catur mapiteges papat, marga mapiteges margi, lan yoga mapiteges ngendaliang dasa indria mangda ngruruh kasukertan jagat. Yening jangkepan krunane ring ajeng mapiteges maka papat pemargi sane kelaksanayang ngendaliang dasa indria  mangda ngaruruh keluihan lan kasukertan jagat wenten bahbahan nyane luire:

1.      Bakti Marga inggih punika yoga sane kelaksanayang ngaturang bakti ring Ida Sang Hyang Widhi Wasa minakadi ngaturang bakti ke pura, bakti ring guru susrusa lan bakti ring guru rupaka.

2.      Karma Marga inggih punika yoga sane kelaksanayang antuk makarya sane mautama minakadi ngruruh pangupajiwa mangda iraga manemu bagia lan santi, masedana, medana punia, maka miwah sane lianan

3.      Jnana marga inggih punika yoga sane kelaksanayang antuk ilmu pengetahuan sangkaning manah nuek lan lascarya minakadi malajah sane seleg, madwijati, maka miwah sane lianan

4.      Raja yoga inggih punika yoga sane kelaksanayang antuk meditasi ngruruh kalanggengan ring jagat luire tapa, brata, upawasa, lan semadi

Inggih ratu para pamiarsa sane dahat rumaketang titiang, yening ajaran agamane punika prasida kalaksanayang sinah sampun sehananing urah – arih parilaksanane ring marcapada  prasida kasuluh ikang prabha , santukan ajaran catur marga yoga puniki, pinaka sundih ritatkalaning maparilaksane tur iraga dados para janane ring Bali sida dangan maparilaksana sane patut.

Inggih ida dane sareng sami sane mustikayang titiang wantah asapunika presida titiang ngaturang jagra pinunggu  dumadak napi sane sampunkawedar iwawu dumadak  sane amatrayang titiang puniki wenten pikenoh ipu maka tune kirang antuk titiang nelantarang banget titiang ngelungsur geng  rena sinampura maka wesana atur titiang tan lali titiang sineb antuk parama santih

            “OM SHANTI SHANTI SHANTI OM”